Дэлхий даяар жил бүрийн 12 дугаар сарын 03-ны өдрийг “Хөгжлийн бэрхшээлтэй хүний эрхийг хамгаалах олон улсын өдөр” болгон тэмдэглэдэг. Энэ онд “Илүү сайнаар цогцлоох нь: Хөгжлийн бэрхшээлтэй хүмүүсийг тэгш хамруулсан, хүртээмжтэй, тогтвортой цар тахлын дараах дэлхийн төлөө” уриан дор тэмдэглэн өнгөрүүлж байна.

Тус газраас “Хөгжлийн бэрхшээлтэй хүний эрхийг хамгаалах олон улсын өдөр”-ийг тохиолдуулан Нийгмийн халамжийн тухай багц хууль, Хөгжлийн бэрхшээлтэй хүний эрхийн тухай хууль, холбогдох журмуудын хүрээнд Нийгмийн халамжийн хэлтсийн дарга Ш.Ганцэцэг, дохионы хэлний орчуулагч н.Мөнхцэцэг нар Нийслэлийн Нийгмийн халамжийн газар пэйж хуудсаар дамжуулан live хэлбэрээр иргэдэд мэдээлэл, зөвлөгөө өгсөн. Шууд live хийх үеэр 214 иргэн хандаж, 164 иргэний комментоор ирсэн асуултуудад хариулж, тодруулах шаардлагатай асуудлыг тэмдэглэн авч хариу өгч, эргэх холбоотойгоор ажилласан. Коронавирусын цар тахлын үед live хэлбэрээр мэдээлэл хийсэнд иргэд талархалтай хандаж байлаа.

Мөн газрын албан хаагчид энэ өдрийг тохиолдуулан Баянзүрх, Хан-Уул дүүргийн хөгжлийн бэрхшээлтэй 2 хүүхдэд өөрсдийн цуглуулсан мөнгөөр авсан өвлийн комбинзон, ороолт, малгай, бээлий бүхий дулаан хувцсыг сэтгэлийн бэлэг болгон гардуулан өгсөн.