Нийслэлийн Засаг даргын 2020 оны “Зорилтот өрхийг сайжруулсан түлшээр хангах тухай” А/30 дугаар захирамжийн хүрээнд дэлхий нийтэд өндөр хурдацтай тархаж байгаа Коронавируст “COVID-19”-ын цар тахалтай тэмцэх, эрсдэлийг бууруулах зорилгоор зорилтот бүлгийн өрхүүдийг сайжруулсан шахмал түлшээр хангах арга хэмжээг Нийслэлийн Засаг даргын Тамгын газар, дүүргүүдийн Онцгой комисс, Нийслэлийн Нийгмийн халамжийн газар, Нийслэлийн Агаарын бохирдолтой тэмцэх газар, “Таван толгой түлш” ХХК хамтран үе шаттайгаар зохион байгуулж байна. Зорилтот өрхүүдэд сайжруулсан шахмал түлш тарааж буй ажлын явцтай Нийслэлийн Засаг дарга бөгөөд Улаанбаатар хотын захирагч Д.Сумъяабазар ирж танилцан, холбогдох албан тушаалтан, иргэдтэй уулзан санал, хүсэлтийг нь сонсож, бүх нийтийн бэлэн байдлын үед нийслэл хотын удирдлагын зүгээс авч хэрэгжүүлж буй арга хэмжээ, цаашид хийгдэхээр төлөвлөж буй ажлуудынхаа талаар тодорхой мэдээлэл өгч ажиллалаа. Цаашид төвийн 6 дүүрэгт энэхүү арга хэмжээ үргэлжлэн явагдах бөгөөд 2020 оны 11 дүгээр сарын 25-ны өдөр 6 дүүргийн 23 хорооны 1344 өрхөд сайжруулсан шахмал түлшийг хуваарийн дагуу олгосон байна.